另類影評：猩猩打飛機
2006年01月01日
除夕，為了一句懶(1)浪漫的話，我付出了沉重的代價。我跟女朋友說：「今晚我們不如一邊看『星星』(2)，一邊倒數吧？」於是當晚我們一起去看《King Kong》，真是病從口入，禍從口出，這次食字食出事了(3)。
荷理活電影的節奏，普遍是呈「W」狀的，意思即是：高潮>回落>高潮>回落>大高潮。一開始先來一個觀能刺激，找住觀眾的心，之後才交代人物關係及劇情，當節奏開始走下坡，便再來一個高潮位，如此類推，最後來一個終極高潮便收檔。而《King Kong》倒是採用了「／」狀的手法，一邊交代劇情，一邊慢慢地把節奏推向高潮。香港觀眾大多看慣呈「W」狀的電影，所以不少人說《King Kong》開首45分鐘很沉悶。老實說，我並不介意一開始沒高潮，問題是這根本是一齣典型投資億萬的巨大爛片。
一隻大猩猩愛上金髮女，基本已挺難令人信服，而且感覺上有點變態，好「人獸」。不過我心裡已替導演編劇解釋，因為孤島上沒有雌猩猩，在無可選擇的情況下，唯有選擇人類，最少都算是近親。再說，這已是一個經典劇情，無謂爭辯。然而，其他的反駁位多不勝數，隨便也能找幾個，其中最離譜(4)的一段，是說船長、導演一行人，來到孤島找場景拍電影，當中自然要搞些高潮位，經過一番驚濤駭浪，船撞向礁岩，破了洞入水。船長大聲令下，要把船內能棄置的東西，都拋到海裡去。可是，上到岸後，卻說要生擒大猩猩，把牠運回美國。大佬(5)，隻大猩猩成廿幾三十呎高，斷估(6)重量都要以噸計（算）啦！剛才說要減重，轉頭就說要搬隻猩猩返（回）紐約，你恰我老人痴呆呀？好！驚濤駭浪算（了），隻船穿窿入水都算，何必加一段拋東西落海的情節？我絞盡腦汁都想不到合理的解釋。
其中還有很多不合理的情節，例如土人人多勢眾，生擒女主角，棒打城市人，好勁(7)，但又突然無端端人間蒸發，城市人繼續大模大樣地捉猩猩，那些土人到了哪裡去？（還有，為何低等民族一定要是黑人？我覺得布殊更野蠻。如果每個土人都好像布殊咁嘅樣(8)，我會看得開心好多。之後一群速龍追殺梁龍(9)，在梁龍逃跑時，不小心踏死了不少速龍，既然梁龍勁咁多(10)，為何一開始要逃走？又例如，人類比起暴龍，其實好細粒(11)，個島有咁多嘢食(12)，為何要千辛萬苦追殺人類？攝牙隙都唔夠啦(13)？我心裡只好這樣解釋，佢地同香港的女孩子差不多，不好正餐好零食，就係貪人類細細粒，食落口又唔多覺食咗(14)，純粹過口癮(15)。
不過，電影裡亦有一些小情趣，當King Kong打倒三條暴龍，勇救女主角，之後又不理睬女主角，我完全摸不著頭腦。坐在身旁的女朋友解釋：「牠在發脾氣。」嗯，果然是同道中人。之後，King Kong繼續溫女(16)，睇(17)完日落又睇日出，去到紐約仲識溜冰(18)。老兄，你係有一手，如果靚仔啲(19)，分分鐘(20)勁過陳冠希。
隨後的基本劇情都估到(21)，之後人類把猩猩帶回美國，然後猩猩逃走，大鬧紐約，與女主角相遇，最後就好似鄭伊健咁(22)，隨時弊命。但，頂癮(23)之處在於我由頭到尾都不明白，男主角在戲裡的作用是甚麼，隻猩猩瓜咗你先上樓搵女主角，為乜？(24)我覺得佢都係返二次大戰時期彈琴好一些(25)。
最後一場，當然是King Kong帶女主角逃到摩天大廈的經典場面。但我又不明白，為何猩猩要爬上去，樓上沒有逃生門，死路一條，為啥？難道為了帶女主角睇日出？真係為女死，為女亡。隨後飛機殺到，大廈頂面積狹小，猩猩做唔到乜野大動作(26)，成廿幾分鐘，我淨係睇住啲(27)飛機來來回回開火，猩猩跳來跳去，偶然轟下一、兩架飛機，最後傷重、告別、墮樓、身亡、結局、散場。臨完場最後兩句，是「猩猩被飛機打死了。」「不，猩猩是死在美女手上。」譯得不夠傳神，要是我，定會譯作「猩猩打飛機(28)打死了」，那便能徹底回應「猩猩是死在美女手上」一句。看畢整齣戲，唯一的收鑊是重溫諺語「色字頭上一把刀」，無論你幾好打，鹹濕(29)都係好危險。驀然，想起以前一句粗口歇後語，謎面是「猩猩打飛機」，謎底是「玩燃完」(30)。這隻「玩燃猿」(31)的結局，當然也是「玩燃完」。
註腳
(1)懶：扮、裝。
(2)星星：在廣府話中，星星與猩猩同音。
(3)食字食出事了：玩諧音或相關語玩出禍來。
(4)離譜：不合理。
(5)大佬：老兄。
(6)斷估：亂猜。
(7)好勁：很厲害。
(8)咁嘅樣：的樣子。
(9)梁龍：又名長頸龍，體積比暴龍還要大。
(10)勁咁多：厲害得多。
(11)好細粒：很小。
(12)個島有咁多嘢食：島上有很多糧食。
(13)攝牙隙都唔夠啦：指食物份量不足，不足填滿牙縫。
(14)食落口又唔多覺食咗：吃了又不覺得吃了。
(15)純粹過口癮：為了滿足貪吃的感覺。
(16)溫女：泡女。
(17)睇：看。
(18)仲識溜冰：還懂得滑冰。
(19)靚仔啲：俊俏一點。
(20)分分鐘：隨時。
(21)估到：猜得到。
(22)咁：般。
(23)頂癮：摸不著頭腦。
(24)隻猩猩瓜咗你先上樓搵女主角，為乜：猩猩死了，你才上樓找女主角。為啥？
(25)全句意思：男主角是《鋼琴戰曲》影帝，飾演鋼琴家。
(26)做唔到乜野大動作：幹不到大動作。
(27)淨係睇住啲：只看著那些。
(28)打飛機：自瀆。
(29)鹹濕：好色。
(30)玩燃完：粗口，意指死、糟透了。
(31)玩燃猿：玩陽具的猿。
Posted in: 電影 |
按此回應 | 回應的RSS | 暫時未有引用通告| 
(0)
2006 十一月 11 at 4:30 am 關於《另類影評：猩猩打飛機》以前的回應：
byebye - 1/1/06 9:58:51 pm
你依個係笑爆嘴的解讀方式.....
洋 - 1/1/06 10:44:05 pm
byebye，不過我覺得這齣戲真的不太好看。
[訪客
洋 我也跟你來個''恭喜發財'' ! !
洋 - 1/2/06 2:02:14 am
Don，發財唔嫌早，大家咁話。
[訪客:大英] - 1/2/06 3:10:20 am
同道中人??? 呵呵，我只係行使緊我既權利啫~
洋 - 1/2/06 11:25:18 am
大英，有權利必須有義務啊！
[訪客:Jennie] - 1/2/06 7:22:26 pm
哇洋洋你翻生啦... 勁爆笑, 好野!
洋 - 1/2/06 9:49:50 pm
Jennie，因為隻猩猩激到我好慶，改變了我封筆的打算。
[訪客
阿洋失左業，唔駛忙，又可以寫番野，真係唔錯，哈哈。最重要既係又可以睇到你寫o野嘛。
話雖如此，希望你早D搵到野撈啦: ) yeah!
Jennie - 1/3/06 12:15:32 am
洋洋,
甘隻猩猩都好好野喎, 連你呢舊 "頑石" 都改變到!!
洋 - 1/3/06 11:00:31 am
Don，不是啦，早就找到工作了，基本上沒怎麼停過，下一回我要下定決心，做個隱閉青年。
咁有你地哩d咁肯支持既讀者，一定會繼續寫的。
洋 - 1/3/06 11:02:37 am
Jennie，我都係求其講下，之前一直冇寫，都係因為太累，現在比之前好些，加上剛剛看完king kong又有少少感覺，於是便寫下來。
[訪客:Man 呀] - 1/4/06 12:58:01 pm
哈哈，好鬼開心睇見你的 "影評"呀，
我都有睇套戲，不過我就遲左買飛結果坐左頭等位！
(其實係果日世貿last day搞到我返唔到家先咁決定！)
塊面貼住個螢幕咁，眼球完全唔識自動對焦，
淨係睇到黑ma ma一舊野在高速移動，
我費事搞到近視加深，最後決定希埋眼。
60蚊響數碼港坐3個鐘都算係咁la！
[訪客:Man 呀] - 1/4/06 1:00:54 pm
洋洋你說跟瑞琪兒是同行
咁我定要捧你場wor
[訪客:Man 呀] - 1/4/06 1:05:30 pm
其實我響BU都有睇過原裝果套
果時盧偉力都話隻腥腥係咸濕架la
此乃人性的表現，人=獸
[訪客:瑞琪兒] - 1/4/06 6:07:00 pm
man呀，我都試過坐第一行睇《盜墓迷城》，睇到眼都花埋！
洋，我細妹仲極力推薦我睇king kong，但最終我睇左蝦你老實！
[訪客:Man 呀] - 1/4/06 6:33:30 pm
瑞琪兒呀，我好想妳呀
我張sim card唔見左無晒d冧把
妳見字就腥返個冧把去我艾c招la
我呀依家返緊工架，不過就蛇一陣上黎
就見到妳留言............命運安排妳早我一日出世
也安排妳早我dd黎返依度.........哈哈唔知自己up 咩
見字即腥la wai！
洋 - 1/5/06 11:08:36 am
Man呀，咁妳即係唔知齣戲講乜啦，妳會唔會睇唔明哩一篇呢？
捧我場？捧邊樣先？
正確應該係：人=盧博士=獸
妳留俾瑞琪兒個段野，睇怕都冇幾多個人睇得明。
洋 - 1/5/06 11:12:54 am
瑞琪兒，我對蝦你老實冇乜興趣，不過真係唔好睇猩猩。
突然，我發覺今個檔期有好多動物電影。例如：
猩猩 《king kong》
雞 《四眼雞丁》
鴨 《情義兩心知》
笑煙 - 1/6/06 5:45:14 pm
洋,
睇到恐龍當人係零食,
一個字,妙.
洋 - 1/7/06 11:18:18 am
笑煙，看來妳也是不好正餐愛零食吧？對嗎？
[訪客:dAfFY] - 1/7/06 7:24:16 pm
頂...你笑到我lei..
頂.搞笑!!
SINGO♥*LE - 1/7/06 8:40:00 pm
我想問下你
你係點整"個個蜘蛛俠"架呢
我只係可以用指定既網頁樣式.
thanks a lot
[訪客:綠豆] - 1/7/06 10:50:05 pm
洋兄:
小弟佩服, 你又有沒有看過另一部荷里活經典爛片“Dick Tracy"呢? 如果有, 兩片哪一套更爛? 請賜教!
洋 - 1/8/06 11:55:08 am
dAfFY，不如你也試試寫這一類文章吧？
洋 - 1/8/06 11:58:05 am
SINGO*LE，這是我的筆友MIDDLE教我的，你可參看他的網頁便能知道了。
http://www.bloghk.com/blog.php?id=250917
http://www.bloghk.com/blog.php?id=258680
洋 - 1/8/06 12:01:52 pm
綠豆，"Dick Tracy"有看過啊，但已是小時候的事了。我只記得主角的服裝做型，至於劇情，通通都忘記了。所以它爛不爛，完全沒印象。
格格 - 1/8/06 1:03:00 pm
你寫得咁搞笑，雖然我未睇過套戲，都忍唔住睇下你講咩，我諗我都無咩機會係戲院睇度呢套戲啦。
我試過坐在第一排睇的戲是"驚濤駭浪"，些浪好似真係撲埋泥咁，好刺激！
洋 - 1/8/06 1:20:53 pm
格格，我覺得妳應該把名字改為「湖南格格」會好d。
返黎睇都得呀，其實好無聊，不過又幾多人覺得好睇。
我買票那天，都差d要坐前面幾行，幸好還有幾個空位在後面。如果睇king kong坐第一排，妳只會看到一團黑色的東西閃來閃去。
sagittariuscity(City Lam) - 1/8/06 4:40:13 pm
我都未睇過這個新戲~~不過睇完你寫呢篇真的笑到我死~~~不過如果把這個變左做「五仔」會係tim...
會唔會到時變左暴龍vs猩猩vs人類大雜交呢?
洋 - 1/9/06 2:30:33 am
sagittariuscity(City Lam)，我覺得齣戲真係唔係咁好睇。
其實係潛意式，哩齣戲已經夠變態。
初學者♂（Ｔｉｍ） - 1/13/06 9:30:30 pm
好正的影評~~XDD
洋 - 1/14/06 12:32:26 pm
初學者♂（Ｔｉｍ），謝謝。