擇偶條件
2004年12月06日早前看了朋友T的日記，當中談及她的擇偶條件。我想Ｔ是個要求相當高的女孩子，所以我妄自用她的擇偶條件，跟自己比較一下，看看自己去到甚麼水準。當中並沒有獲得她批准，希望她不要見怪吧。
外形–
－高過我at least 3寸﹐not taller than 5'10（第一條就衰，算吧，劉德華同梁朝偉都唔高je……）
－年齡﹕25-32（出年先夠25）
－唔肥唔瘦（應該ok）
－五官端正﹐謝絕靚仔﹔樣子可愛有趣﹐似卡通人物有零點五既加分（似卡通人物？笛子魔王算唔算先？）
－短髮（啱啱剪左）
－有鬚 (型0個隻) 都有零點五既加分（有，大把，不過唔型之嘛）
－乾淨企理（嗯……，間房冇細茵武器既……）
－品味﹐著重自己的儀表﹐casual 得0黎又滲透出個人既style (lee方面我係特別重視的)（我求其到爆，雞仔牌底衫 + 波褲 + 人字拖算唔算有style？）
性格/內在–
－細心﹐sensitive﹐體貼 （算吧……，自己知自己事）
－專一﹐唔得拈花惹草﹐勾三搭四（無資格唔專一）
－重視我﹐放我在第一位（都應該得嘅，我估）
－尊重我（終於搵到一條係完全無問題啦！嗚…）
－成熟（算吧，我有時真係好低能）
－風趣幽默 (但唔係以為自己好好笑0個隻) （我太喜歡硬gag了）
－有才華 (有某方面既專長比我admire) （有「財」自然可以「華」了）
－有安全感（只比焚哥稍遜）（焚哥是我屆一個異常忠厚沉實的莊員）
－獨立﹐決斷（都ok既）
－對感情認真﹐唔係玩玩0下（非常好，妳唔玩我就得嘞）
－自信但唔係自大（唔自卑都偷笑）
－大方得體（有啲難度）
－有咩就講出來 (唔會收埋收埋)（我都想，但妳聽完唔好又打又鬧得唔得先？）
－就晒我﹐縱我寵我但在適當時候識得管我（我會去讀MBA）
－轉數高（我不是四驅車）
－住家佬feel﹐識煮0野食（公仔麵無問題）
－願意聆聽（睇時間，最好唔好半夜，除非第二朝唔使返工）
－有耐性（一般都ok，但都要睇時候）
－有風度﹐有家教（瘋度就有……）
－唱得一嘴好歌 (有零點五既加分)（獻醜不如藏拙，有自知之名有冇分加呀？）
－明白事理﹐唔會無理取鬧（ok）
－high EQ﹐唔會亂發脾氣（ok）
－唔會丟低我拂袖而去（我怕係調返轉……）
－了解我﹐最好我唔出聲都知我想點 (知道我幾時唔想被人煩)（唔好玩我啦……）
－同我有similar既價值觀（唔清楚）
－簡單（怕妳嫌我太簡單）
－唔計較 (小家)（唔係血海深仇都ok）
－唔煙唔酒唔爛賭唔嫖唔吸毒（已有其中兩樣）
－身家清白（直頭一窮二白）
－無不良嗜好或特殊僻好（我的出現已是人世間的「不良嗜好」或「特殊僻好」）
－唔要富家子弟﹐名門望族後人（我姓何，但與何鴻燊沒有任何關係）
－唔要ABC/BBC（百份百土產）
－教育程度與我差不多（唔係first hon有冇問題？）
－sociable﹐唔太怕醜﹐見得大場面（sociable哩個英文點解？）
－真誠﹐唔虛假﹐唔要小人（我剛立志要做小人）
－熱情奔放﹐但唔可以煩（……）
－肯花時間同我玩（返工及睡覺時間除外就得）
－鍾意笑﹐傻仔（又話要成熟？蠢仔算唔算傻？）
－顧我既感受﹐從人角度去想（盡量啦）
－唔自私（得啩…）
－唔怕被我當街當巷攬﹑嘴﹑拖﹑咬（睇怕妳睇左前面一大段野之後，妳會放棄這個想法）
－funny funny funny 唔悶﹐有情趣（如果我有咁勁，我會去搞楝篤笑）
－24小時on call ( 做緊重要事或工事除外)（我會努力買六合彩的了）
－真正愛我﹐關心我（如果妳仲肯要我的話）
－有正當職業﹐安穩的入息 (生活無憂但唔要太有$)（聽聞搞劇場不算是正當職業）
－上進﹐有理想(但唔係空口講白話)（我的理想遇到強勁的敵人，叫現實）
－會比最好既我 (龍鳳鬥的華Dee)（華Dee喎，佢得120分鐘壽命（片長）咋……）
－千依百順﹐善解人意（怪不得林夕說：「做隻貓，做隻狗，不做情人」）
－高既容忍程度﹐頂的我順（你頂得順睇到而家，我都頂得順嘅）
－仲有好多﹐寫唔晒……但亦可以好簡單﹕合眼緣﹐相處舒服﹐好feel﹐我鍾意。0甘就完滿結束0架喇﹗（不是能力範圍以內）
如吳大力所言：「妳喜歡外星人。」測試完畢，我是地球人。
Posted in: 朋友, 愛情 |
回應(1) | 回應的RSS | 暫時未有引用通告| 
(0)
2006 十一月 10 at 7:44 pm 關於《擇偶條件》以前的回應：
devil_runaway - 12/6/04 8:32:44 am
這樣子的擇偶條件？能嫁得出去嗎？
小欖 - 12/6/04 9:57:21 am
唔唔,我都試過列過出黎,不過好似都無佢咁過份...哈哈.不過寫之嘛,梗係要寫到最好啦~~不過通常到真正遇到,可能係曾志偉也一樣愛得要死都唔定.
洋 - 12/6/04 10:48:42 am
devil_runaway，嫁得出的，不過要移民，去火星。
洋 - 12/6/04 10:49:49 am
小欖，我寧願條件簡單一點。
小乙 - 12/6/04 11:14:22 am
佢令小乙想起帶肥肥形眼鏡框兼有眼鏡鏈既闊太．．．
devil_runaway - 12/6/04 11:19:36 am
跟你的朋友繼續保持聯絡，假如一天她真能嫁得出去，你再想辦法結識她的丈夫，然後把實情告訴我吧
浩二 - 12/6/04 12:36:54 pm
好正wor呢篇。我鍾意！
「風度」變「瘋度」...
「理想有了最大的敵人叫現實」...
好爽。
洋 - 12/6/04 1:32:44 pm
小乙，她是一個標緻的女孩呢。
洋 - 12/6/04 1:33:30 pm
devil_runaway，實情估都估到，就是timing到了，搵個唔算太差的就算了。
洋 - 12/6/04 1:41:34 pm
浩二，想不到你喜歡這一篇呢，大概你也有身同感受的地方吧？
笑煙 - 12/6/04 4:42:38 pm
哈.......真想問一個問題,
假設她現實really找到這個dream man,
但他在生殖方面有缺憾,
咁,她仲要唔要呀?
越"洋" - 12/6/04 6:38:46 pm
太不設實際喇...去邊度搵丫...李嘉欣都搵唔到啦...i bet
瑞琪兒 - 12/6/04 8:52:15 pm
這個人有男朋友的嗎？若有，請告訴我，我想見識一下；若無，請她死心吧！
還有，洋都講過，對人有要求，也要讓人對你有要求。可以嗎？
洋 - 12/6/04 9:42:23 pm
笑煙，那真的要問她呢。
洋 - 12/6/04 9:43:02 pm
越"洋"，因為女孩子都想找王子。
洋 - 12/6/04 9:46:38 pm
瑞琪兒，沒有。不過人家的我不管的。
道理可能大家都明白，但做呢？可能又是另一回事了。
阿肥 - 12/7/04 1:52:29 am
(我的出現已是人世間的「不良嗜好」或「特殊僻好」）
我鐘意呢句~^^"
唔知點解聽落特別有點親切感......=.="
devil_runaway - 12/7/04 1:53:11 am
女人！唉！
洋 - 12/7/04 2:03:09 am
devil_runaway，禍從口出呀！我不想死。
洋 - 12/7/04 2:10:21 am
阿肥，因為妳喜歡黑色幽默？
devil_runaway - 12/7/04 2:29:55 am
我就是不怕死，反正算命的都說我總有一天會"死"在女人手上！這個"轟烈"的死法，我是嚮往的．不過還是不要把帽子扣在你處，免得你也跟我有著同一遭遇
turtle - 12/7/04 3:52:31 am
我想知佢係唔係一名作家?
搵到個咁既人, 都大把人搶啦, 更何況呢個或然率係接近零!
Irene - 12/7/04 6:14:03 am
不是每個女孩子都想找王子，王子只會要公主。
你朋友的要求真的頗高，不過女孩子多只是說說，到了遇到自己喜歡的，甚麼條件也會忘了。
Ceci - 12/7/04 11:22:28 am
當佢遇到一個佢鍾意既人，
根本就唔會去計較佢有冇以上條件，
所以以上條件，應該係用來拒絕一d佢唔鍾意既人啫！
洋 - 12/7/04 2:26:33 pm
devil_runaway，果然「萬般皆是命，半點不由人。」要死的，始終會死；要活的，還是會活下來。
洋 - 12/7/04 2:33:18 pm
turtle，不是的，她是讀公共關係的。
這麼完美的情人，要愛也不易。
洋 - 12/7/04 2:44:27 pm
Irene，這世界根本沒有王子呀……。
不算頗高啦，是很高才對……。哈，說得也是，很多時候，最終喜歡的那一個，與想像的，都大相逕庭吧？
洋 - 12/7/04 2:45:16 pm
Ceci，這麼說來，我覺得妳說得挺有道理呢。
Jennie - 12/7/04 4:16:02 pm
洋洋.
你為什麼去了剪頭髮? 之前那樣子不是好地地嗎?
Alex - 12/7/04 4:54:13 pm
好高既要求....哈哈哈哈!~
一半都做唔到呀~~哈哈哈哈哈哈~~
洋 - 12/7/04 9:04:47 pm
Jennie，人在江湖，身不由己。
洋 - 12/7/04 9:05:32 pm
Alex，哈，不打緊，你是扮王子的仆街啊~~~
（說笑而已）
子鈿 - 12/8/04 2:27:42 am
洋，我認為「品味﹐著重自己的儀表﹐casual 得0黎又滲透出個人既style 」呢part你完全符合。
黃兒醫師 - 12/8/04 2:40:38 am
唔
成件事好doo...
佢講0岩晒女仔應該想要既野,
但係遇倒都好,
唔鍾意就係唔鍾意.
解決方法好簡單: (是但一樣都得)
1. 降低要求
2. 儲定錢買樓 (唔...)
3. 鍾意女仔 (因為只有女仔明)
洋 - 12/8/04 3:00:33 am
子鈿，很久沒見你留言啦。
你竟然咁認為？我而家求其到爆，唔凍死就得勒。
洋 - 12/8/04 3:30:55 am
黃兒醫師，我看過這樣一篇文章：
《好老公俱樂部》
城中有間專為女士而設的俱樂部誕生, 名「好老公此中尋」俱樂部,全城女士趨之若騖, 都想第一時間加入。
不過條件十分苛刻, 入會費相當高昂, 入這個俱樂部都須遵守他們訂下的規條,就是「有上無落, 不准掉頭」。
俱樂部樓高六層, 充滿好奇心的女士, 推開第一層的門, 赫然見到一塊大牌,上書 :「此層男士有入息穩定的工作。」
女士們嗤之以鼻:「好叻咩?」
大夥兒湧上第二層, 門口的大牌寫著:「此層男士既有入息穩定的工作,也愛小孩。」
女士們心想:「果然係好男人, 不過睇多一層先!」
第三層的牌寫著:「有工作, 愛小孩, 英俊!」女士們大樂, 正想衝入去挑選,但回心一想, 第四層呢?
第四層的牌寫著:「有工作, 愛小孩, 英俊兼幫手做家務!」
她們愈看愈興奮 :「第五層肯定係碧咸 !」
第五層的牌果然寫著:「有工作, 愛小孩, 英俊,幫手做家務兼浪漫!」可是所有女士的腳步都沒有停在第五層, 全部衝到俱樂部的頂樓。
門一打開, 上面的大牌寫著:「你是第一萬二千三百四十人到訪此層,此層沒有男人提供。閣下光臨此層, 只表示世上的女人都是貪心的,
都是難以滿足的動物,請沿右手邊樓梯回到出口, 多謝光臨。」
Alex - 12/8/04 5:29:38 am
哈哈~~~過到王子癮喎~~哈哈!!
我好認同《好老公俱樂部》...哈哈!!
你好咩,要求就會提高!
dreamer - 12/8/04 10:07:06 am
我想知道, "没要求" 算不算是 "要求"! 不能不承认, 女人们都是贪心的.
小玲 - 12/8/04 6:45:38 pm
佢"相"鑽石架咩~!
咁多要求~
你的朋友T - 12/8/04 9:04:35 pm
哇﹐估唔到0甘多回響。看過39個回應﹐只有一位朋友明白我寫那篇日記的用心。
謝你﹐ceci。
我好清楚現實與理想的分別。你認識我的前度(阿隱影莊員)﹐就得知其實我係可以好無擇偶條件......
洋 - 12/9/04 1:08:10 am
Alex，讓我揭穿你的身份吧~~~嘿嘿~~~
我也挺喜歡這一篇，男人會有同樣的效果嗎？
洋 - 12/9/04 1:27:37 am
小玲，我這篇已被朋友T發現了，她亦親自剖白。
她當然不是鑲鑽石，但真的有很多追求者。
洋 - 12/9/04 1:42:19 am
朋友T，既然有一位朋友明白妳，也不枉了。
我明白妳的意思，不知隱影莊員而家點呢？
洋 - 12/9/04 1:50:42 am
dreamer，說到底，我不認為選擇情可以沒要求。只不過做人有時不可以貪得無厭。知足才能常樂。
care - 12/9/04 10:24:54 am
介紹你的朋友看一個網站，內容與她所要求的男友剛好吻合 (但係唔知堅定流)。
http://www.princessdiane.com
由於篇幅頗長，請細心"觀賞"，因為網站會不停update，現在browse的話應該是"life"的第三篇。
洋 - 12/9/04 11:54:00 am
care，嘩，又是公主……
只怕這個世界上，公主太多，王子太少。
care - 12/9/04 1:40:45 pm
其實真實既情況係公主同王子一樣，都係無咩幾個，我都係應認為有自知之名既人最可愛﹗
洋 - 12/9/04 1:58:08 pm
care，其實我覺得是沒有的，起碼我認為沒有王子。就算有公主，我也不覺得公主吸引。如果我的女朋友是白雪公主，無知、毫無社會常識，我只會感到很痛苦。
有自知之名固然是好，總之做回自己就好了。沒必要攀龍託鳳吧？
care - 12/9/04 2:48:18 pm
我對你既講法只認同一半。無錯，係現實中的確係冇所謂既公主同王子(我唔係講緊威廉王子嗰種王子，而係童話中既公主同王子)。不過，人總係鐘意幻想，至少會將自己鍾意既人當做公主同王子般看待，好似父母對自己既仔女，都當正佢地係公主同王子咁百般遷就﹔又如情人眼裡總係出西施，話之你身邊d朋友數到佢個對象一文不值，佢都一於好少理。
人總係會對一d現實既嘢存有不切實際既幻想，係咪!?
洋 - 12/9/04 3:44:17 pm
care，也許我們各自有自己的想法。怎麼說呢，近幾年許多實實在在的事發生在眼前，我覺得單是幻想沒甚麼意思，反正到頭來，要面對的還是現實。
記得電影《月黑高飛》，其中一個長期監犯說：「希望教人發瘋。」
care - 12/9/04 4:19:45 pm
洋，我覺得你年紀輕輕，但係好有自己一套既思維，好特別，其實咁係好事，不過你有時惗野都幾灰，好似唔多開心咁，不過呢d純粹係我個人既惗法，如果唔係既話，希望你唔好介意。Anyway，希望你於不久既將來會遇到d開心野啦﹗
洋 - 12/9/04 4:52:23 pm
care，想不到仍有人認為我年紀輕輕呢。雖然我都唔算老。
我不知我是否屬於有自己一套思維的人。但是我知道自己在想甚麼，為甚麼會這樣想，而且的確很多人不明白我為何這樣想，或根本不知我在想甚麼。
其實我認為我不是想得灰，而是我對世界上灰暗的事特別敏感（我並沒有排除世界也有美好的一面）。而我有感興趣、想寫的，就是這些事。
我亦不是不快樂，但亦說不上快樂。我只想把世界上，某些人們不想知的事實寫出來而已。
笑煙 - 12/9/04 6:24:08 pm
洋,
"我亦不是不快樂，但亦說不上快樂"你把我心裡的說話說出來了.
其實灰灰的不是很好嗎,起碼沒有黑色咁"污糟",不過不夠"型"而已!
洋 - 12/9/04 11:42:47 pm
笑煙，妳希望這樣嗎？
我也不是覺得灰暗的東西特別好，只是這些灰暗的確存在，而我又很想說這些事，如此而已。
Jennie - 12/11/04 12:31:24 pm
洋洋不灰就不是洋洋, 洋洋不頹廢就不是洋洋, 如果洋洋無情情變得很樂天, 那我會很怕的, 哈哈~~~
洋 - 12/12/04 2:21:25 am
Jennie，就算我很快樂，我仍會堅持寫灰暗的東西。因為這些東西始終是存在的。
WENDY LEE - 4/25/05 11:51:57 am
如果你錯過太陽而流淚, 那麼你也將錯過星星曪
洋 - 4/27/05 12:41:34 pm
WENDY LEE，何來此話？
WENDY LEE - 5/21/05 10:51:39 am
洋, 只想告知你不要因為某些事或是過程而令自己不開心,因為你說仍要堅持寫灰暗的東西, 如果你能改寫一些帶有色彩的,
相信會可以因你寫出來文章能令每個人閱讀後更開心!
洋 - 5/21/05 11:52:48 am
WENDY
LEE，我沒有不快樂啊！我只是覺得寫少人寫的東西才有意思。那些快快樂樂的文章，一來我不會寫，二來也有太多人寫了，我暫時並不打算改變自己的寫作風格。
愛覓尋 - 6/24/05 5:15:34 pm
無意中看到了這篇文章，又爽，又好笑，世上哪有這樣的人。
但看著看著，我有點替你可憐，為什麼你要跟那個女孩的標準型去比？
從別人的迴響中，知道你愛寫一些灰暗暗的文字，你說你仍會堅持寫灰暗的東西，因為這些東西始終是存在的。我是絕對的同意，但我寫灰暗的東西的原因，是因為我想將醜惡暴露，令人無法容忍，因為其實每個人心裡也隱藏著醜惡，沒有人會自己揭破自己，只是讓它無聲無色地存在，我寫醜惡，就是為了令世界變得更美麗。
我這個人還是很樂觀的。
洋 - 6/25/05 2:18:36 am
愛覓尋，根據該文原作者指出，這是為了拒絕不喜歡的男人而寫的，並非真的要求男朋友滿足以上所有條件。
我也不是真的去比較呀，只是我看了她這篇文章，便覺得是個好題材，於是拿來借題發揮。
是的，美好的事已有很多人寫，用不著由我來寫了。大家都不喜歡醜惡的事，但不提出來不等於沒發生，我做人想實事求事一點。在我看來，這個世界的醜惡還是遠多於美麗。
我這個人並非悲觀的，只是想說出人們不想接受的事實。
[訪客:dipsy] - 6/29/05 5:12:38 am
好得很的回應
現在香港女孩嫁不出是他們要求高
還是我們太差呢?
洋 - 6/29/05 11:19:10 am
dipsy，其他人我不知，我自問不算很好，但也不算最差；至於香港的女孩，確實有點高不可攀。
兆洋 - 8/27/06 3:54:43 am
按：此編太多廣府話，亦很難譯，暫時放棄。
康乃馨 - 9/2/06 2:38:01 am
你好細心.
兆洋 - 9/2/06 1:10:10 pm
康乃馨，為何這樣說呢？我還以為這一篇妳可能看不懂。