亡洋補牢

我想，看電影的人，很多時會記著那齣電影是那個導演、那個演員，但鮮有人會理會編劇是誰吧？我看過好些電影，當中有一些對白很精警，但很有可能要看完整齣電影或連同畫才使人覺得精采，所以我另外節錄了一些較為可以獨立而又精采的對白，與大家分享。

《江湖告急》
編劇：陳慶嘉、錢小蕙
（任因久遭殺手追殺，於是他急召四大幫會開會，想成機剷除其他勢力）
老表華：「我最多心架啦，久哥會唔會懷疑我地其中一範做架？我老表華發誓，一定唔會咁做。喂，基哥，你成晚冇出過聲喎，平時好多野講架？」
任因久：「係喎基哥，你今晚好靜喎。」
基哥：「冇，我都遇到個頭號殺手。」
（眾人一起望向基哥）
基哥：「我今朝睇過報告架啦，醫生都證實左，話我有肺cancer。」
（眾人本想吸一口煙定驚，正想吸之際，又馬上放入煙灰缸弄熄它）

《江湖告急》
編劇：陳慶嘉、錢小蕙
（任因久（梁家輝飾）遭數個殺手追殺。阿愉（張耀揚飾）是任因久最好打的保標，拼死保護任因久離開，已身中數槍。他們躲在一旁，槍手逐步迫近）
任因久：「愉，點呀？」
阿愉：「久哥，你走先，我仲頂得住。」
任因久：「傻既，風大雨大，點走呀？」
（槍手走得愈來愈近，搜索著他們）
阿愉：「久哥，我而家撲出去同佢地鍊過，一有機會，你即刻走！」
任因久：「要搏就一齊出去搏。」
阿愉：「唔可以，你唔可以有事。」
任因久：「出得黎行都預左啦，下嘛？」
阿愉：「久哥，其實有ｄ人，注定要為其他人而死。」
（任因久握著阿愉的手，表示感激）
任因久：「阿愉……」
（阿愉也緊握任因久的手）
阿愉：「有ｄ野，我想講左好耐……，其實我一直……，一直……都愛你。」
（二人沉默）
任因久：「哩個時候你講埋ｄ咁既野？」
阿愉：「我知你一剎那好難去接受得到。但我唔講，我怕冇機會。」
（阿愉向任因久點了一下頭，出去與殺手拼過）

《爆裂刑警》
編劇：鄒凱光、葉偉信、張問
吳鎮宇：「每個人都有自己應該同唔應該做既野，我入左錢就應該有我罐汽水，我要既野就係咁簡單。」

《大丈夫》
編劇：彭浩翔、葉念琛、李敏
毛舜筠：「妳明唔明呀？物件係無常，事件先至係永恆。我知道妳好緊張妳同Dr Lee段婚姻，但係婚姻哩樣野係虛無架，隨時可以毀滅，妳控制唔到，亦都掌握唔到，但係妳前面哩件事呢，就可以掌握勒，掌握到前面哩件事，妳就可以選擇，選擇離婚或者繼續哩段婚姻，妳要有證據先至有話事權，妳明唔明呀？」

《大丈夫》
編劇：彭浩翔、葉念琛、李敏
（眾人說出要去滾的理由）
波仔：「每次我跟阿鳳親熱，在最緊張、最關鍵的時候，她總時推開我、拒絕我，說甚麼『你愛我就要專重我』，是呀，我專重她，所以她不要，我從來不勉強她，但是她也應該尊重我想要的權利呀！你家裡不開飯，難道不准我去外面吃嗎？」

《野獸刑警》
編劇：陳慶嘉、陳嘉上
車沅沅：「你d股票有冇損手爛腳呀？」
黃秋生：「揀緊樓呀。」
車沅沅：「咁叻？」
黃秋生：「揀緊樓跳呀。」

《野獸刑警》
編劇：陳慶嘉、陳嘉上
張耀揚：「一陣間搞掂完，你沿路返落黎轉左，阿華係街口泊定車等你……」
大陸仔：「放心啦，哩d野做慣做熟架啦！」
……
張耀揚：「轉左喎，唔係轉右喎。」
大陸仔：「得啦，我地上面忠奸就唔分je，左右分得好清楚架，包係我身上啦！」

《去年煙花特別多》
編劇：陳果
大佬：「收錢呀！」
的士佬：「唔使啦。」
大佬：「唔好咁婆媽呀！我叫你收就收，收唔收呀？！」
的士佬：「咁呀……。」
（大佬付錢）
大佬：「找丫！」
（的士佬開車走，大佬追上前拍打的士，的士停下）
大佬：「做咩呀你！」
的士佬：「你叫我走丫嘛。」
大佬：「我叫你找錢呀！」

《回魂夜》
編劇：技安
周星馳：「你估唔到哩個世界咩都有可能發生。點解呢？因為你冇想像力。愛因斯坦話過想像力比任何知識更加緊要，想像力可以將冇可能既野變為可能。」

《南海十三郎》
編劇：杜國威
十三郎：「好！阿江少儀，點解你係都要拉我見耶穌呢？我同佢\唔係好熟架咋！」
江少儀：「信主，我地可以得到永生，我地可以去天國，你想唔想去天國丫？」
十三郎：「天國？！使去幾遠丫，拿，你睇下丫，哩樹就係天國啦（指著精神病院）！你睇幾多天使（指著精神病人）！」
江少儀：「你唔好侮辱耶穌呀，我話你聽！」
十三郎：「我話你就侮辱耶穌呀你，三唔識七拉我見耶穌。人地都未必得閒肯見我呀。唉！」
江少儀：「唔係……」
十三郎：「永生，永生，永生咪仲痛苦，唉，想死又死唔去，咪驅！傻佬就鍾意永生勒。」

《南海十三郎》
編劇：杜國威
十三郎：「你做人唔好咁執著得架。你雙眼睇得到既野都未必係真既。」
薜覺先：「我話你睇既野唔真就真，你睇下你副眼鏡，一邊都冇玻璃既，羅黎我同你配過佢。」
十三郎：「哎！咪驅，我專登架！查實做人使乜睇得咁清楚丫，求其咁咪算囉！你想睇清楚ｄ，你用有玻璃哩邊囉，你冇眼睇咯，咪用哩邊囉（指著沒有玻璃那邊），樣樣野睇得真，好痛苦架！」

《南海十三郎》
編劇：杜國威
薜覺先：「（對著工人說）較水俾佢沖涼。」
十三郎：「喂，你沖咋，我唔沖呀！」
薜覺先：「喂，你好耐冇沖洗過身啦喎。」
十三郎：「咩呀！我周時洗呀！洗個心，做人最緊要個心夠乾淨得架勒。（對著工人說）喂，一陣較缸水俾我，我吞落黎飲下得架啦。」

《南海十三郎》
編劇：杜國威
（十三郎劇本遭到刪改）
十三郎：「編、導、演，編、導、演呀！幾時都係編劇行先呀！劇本係一劇之本呀！劇本係乜你都唔識呀！轉行啦你，阿叔！」
導演：「係香港拍電影，導演話晒事！」

希望有一天編劇會較受重視和尊重吧。