黑箱作孽
2004年03月31日第一章
香港人是不能失去電視的。當年《歡樂今宵》主題曲一出，觀眾便自動自覺坐到電視機旁。那首金曲曾養活多少香港人的精神：
「日頭猛做，到依家輕鬆下；食過晚飯，要休息番一陣；大家暢敘，無線有好節目；歡歡樂樂，笑笑談談，我地齊齊陪住你。」
日做夜做為的是甚麼？我只想好好的休息一下而已。
第二章
黃金時段，扭開電視，這應該是香港人的反射動作。電視機傳來節目主持人的對話：
「歡迎各位收睇聯褔長生店特約──《睇你點死》！大家好，我係您嘅節目主持人陳鬼怪。」那個穿得像蛤蟆的男人說著。
「我係您嘅節目主持人，大車Ming。」另一個穿得像火雞的女人接著說。
「今日我地節目又會送出總值一百萬既獎金同獎品，大車Ming，麻煩你介紹一下。」
「今晚嘅得獎者將會贏到既獎金同獎品有，榮發石廠送出墓碑連同獎金，價值四十萬；聯福長生店送出棺木連同現金，價值六十萬。」現場觀眾的掌聲，隨著獎金此起彼落。
「聽聞今晚得獎者個喪禮中西合璧，好特別喎。」
「係呀。而家仲落埋大雨，真係好悲莊呀！」
我看見漫天溪錢，像雨點般緩緩灑落，飄呀飄呀，合共一百萬。
第三章
我一邊看著電視，一邊想著，人也死了，還要那麼多錢幹麼？父親的一句話，中斷了我的思路：
「死人節目呀！仲搞到送獎金獎品添。唉，啲人個個都專係發死人財。都冇個正常！」
我沒回應他，然而，父親大人沒有打算因此而中斷他的言論。
「而家ｄ遊戲節目真係好鬼無聊，死人都可以玩一餐。」
「你睇下，幾無聊呀，燒屍呀！」
「都唔知點解而家啲人咁無聊，連呢啲節目都睇。」
「而家啲觀眾品味真係好有問題，咁無聊都睇一餐。」
「真係好無聊。」
我們總以為充滿選擇，其實也只有四個電視台。再說，我們會轉台嗎？人生本來就很無聊吧？
第四章
「喂！唔好阻住部電視！」老媽走過來，阻擋了父親大人的視線。
老媽不理會父親，她似乎找到了甚麼，興奮地說：
「我搵到啲相啦！」
「咩相呀？」
「上年文仔同霞女結婚啲相。文仔件黑色成裝幾型呀。我地個仔膊頭咁闊，著西裝一定型過文仔。」
「啲西裝來來去去咪又係咁既款。照我話，我地個仔咁有性格，應該著唐裝至啱。」
聽到這裡，我開始感到不妙，可是我可以逃到哪裡？香港就是那麼小，要走過一平方尺都要幾千元，比「大富翁」遊戲還要誇張。
「但係西式拉小提琴喎，浪漫好多。」媽繼續說。
「中樂至夠響，夠氣勢。」
「你個人真係古板，而家咩年代呀？」
「呢樣野同年代無關，係原則既問題。」
「我唔想再同你爭論呢個問題，唔係淨番好多時間俾我地嗌架咋。」
「好心你啦，自己嘅終身大事都懶懶閒。」
看啦，火終於燒過來。為甚麼老是要把我磨在中間？我也想有選擇的權利啊！可是我可以嗎？我除了若無其事說一句「我無所謂」之外，還可以說些甚麼？可是一個圓滑的話也不易說，一樣會觸及別人的怒火，父親臉帶慍色地道說：
「呢啲嘢點可以無所謂！」
「咪係！今日你點都唔可以再拖架啦！」媽說
「用佛教儀式啦。」
「梗係唔得啦，咁咪即係拜偶像，天主會罰佢落地獄。求主寬恕佢地！」媽邊劃著十字邊說。
「阿彌陀彿，有怪莫怪。你唔好聽你阿媽講，神愛西人架咋！我地中國人梗係信番啲中國野。你移民去度個邊天堂，都盞做二等公民，千祈唔好聽你阿媽講呀！」父親大人不甘示弱地說。
「你唔好當我唔知喎，佛教明明係阿叉發明。你地成班都係個啲邪惡軸心。」
「咩阿差呀！前排我聽完沙塵大師個talk，佢對生死都唔知睇得幾透，點同你地啲基佬基婆，個個禮拜唔知搞埋啲咩邪教敘會，係到顛覆國家！」
「你地唔好再嗌啦，我個喪禮等我自己搞！」我大聲喝道。
國際關係加宗教問題糾纏不休，這時需要的，是一個中間人，還是由我來幹吧。
第五章
人一出生已是死路一條，全香港七百多萬人，七百萬人也要死，這是一盤有數得計的生意。香港的殯儀館不比地產商少。不過這也十分正常，生人多，死人自然多；生人要地，死人也要地。我沒死過，也沒替人辦過喪事，只好胡亂的找一間殯儀館，只見一個貌似老闆的人，在店內發愣。
「先生，節哀順變。請坐！」老闆一見我進入店裡，醒過神來馬上說。
他眼神興奮，臉上憂傷，外表也真夠滑稽，不過怎樣也不及我可笑吧？
他深深的吸了一口道：「親人離世，心情難免憂傷，但係最大嘅問題係點樣辦理殮葬呀。我地既宗旨係『喪戶至上，服務第一！』。」
我正要問問他們如何「服務第一」，字還未脫出口，他口噴白沫地說：
「我地一向以功德為前提，為喪事者提供優質服務。而家我地提供好多唔同既一條龍殮葬服務，令你地唔使奔波勞碌。」
我的學習經驗告訴我，一條龍的東西都好不到哪裡去。不過還是先聽聽是甚麼東西吧。
「即係套餐，唔使揀，夠方便，啱晒你地至in新一代。」
套餐？開甚麼玩笑？不過或許是好事，我不懂辦喪，有套餐應該會簡便一點吧？於是我便詢問他有甚麼套餐選擇。
「一般人都會揀A餐。A級之選呀！」
「咁即係有啲乜？」我追問。
「都係d基本野黎架啫。包火葬費、棺木一副、先人放大相、靈前花牌一個、潔體、消腫、整形、防腐、化妝……。」他耳熟能詳地說。
我想不到，這竟是基本。其實最終也是火化，弄那麼多東西有何用？再說，我實在不想化那些死人妝，醜化不帥的臉不是一件有趣的事。
「我地係professional，我地d化妝品無防腐劑，無添加。會令到你先人面色要好似和果子咁，白裡透紅。你無須質疑，無須否定，只須相信。」
我覺得跟他繼續糾纏沒意思，看來我又是沒有選擇，算吧，反正死了甚麼也看不見，不理了，只想快快了結這件事，於是我欲中斷他的話。
「我都未講完。個A餐仲包出殯日靈車及豪華旅遊巴各一部。」他興奮的眼神已完全掩蓋他悲痛的臉。
旅遊巴？！那是甚麼一回事？要是我屍變，他帶人來觀賞嗎？這個A餐包的東西也未免太多了。
「要接載你啲親朋戚友嘛！」他說。
我差點以為自己在辦喜事。我要死了，死前還要打鑼打鼓的請親戚來觀禮。那倒不如等待香港迪士尼建成，在那裡辦喪吧！然後再造一個「飛天棺材」的機動遊戲，把我的屍首如炮彈般炸出去，在天空中五馬分屍，來個天葬吧！
老闆看見我臉上有不悅的表情，說道：「唏！死咁大件事，梗要隆重啲。唔係點顯得你孝感動天呢？」
一條屍體炸上天，我看是孝感轟天才對吧？隨便啦，豪華旅遊巴也好，飛天棺材也好，總之辦妥它就是。
「多謝，我地一向價錢最低，速度最高。」他已陷入極度亢奮中。
我驀然醒起一件事，幹麼我要替自己辦喪？就是我的父親母親嘛！我馬上問道：
「等等先，哩個係中餐定西餐？」
「中餐。唔岩口胃？試唔試下個西餐B，我地包埋神父一個。」
中餐西餐也不好，怎麼辦呢？我唯有再找找看，問道：
「有冇一啲多元化啲嘅套餐？」
「梗有！我誠意推薦我地殯儀館嘅皇牌S餐俾你！我地最近同美國太空總署CELESTIS 聯合推出日月星辰永恒太空宇宙餐。首先我地會要你先人15克骨灰，然後以多節體火箭射上太空既地球軌跡，以距離地球870公里既高度，每日環繞地球運轉14次。先人既磁場會圍繞地球，令先袓嘅精神與太空永常同在！只有至親先至可以接收感應。你地哩d孝子賢孫只要一望上天，就可以『隨地致祭，加強運勢！』」
剛才那個迪士尼喪禮，我只是胡亂想出來，沒想過現實比想像更瘋狂。好一句「隨地致祭，加強運勢」，是不是我在太空中，看見碧咸沒狀態，然後就急call親朋戚友不要買皇家馬德里嗎？我沒心情跟他繼續玩下去，斷然拒絕。
「你諗清楚喎，呢次真係個千載難逢既機會黎架，名額有限，報名從速。」老闆還是鍥而不捨地推銷。
我應該更言簡意賅說出我的要求，說：
「有冇一啲餐，係多元化得嚟又比較基本？例如有冇中餐A加西餐B既組合？」
這一回，輪到老闆有點不悅，說：
「你去到餐廳見到快餐A北菇雞飯，同埋B餐牛扒意，咁你可唔可以淨係要A餐嘅北菇雞，搭B餐件牛扒丫？」
「你去開創先河囉！」
「咁d飯同意粉邊個愛丫？」
「但係我真係好需要一個中西合用嘅喪禮。」
「邊會有呢啲喪禮架？你教我點整？」
我沉思了一會，建議他把靈堂分開一半，左邊用基督教，右邊用佛教。小提琴的在左邊，吹喇叭的在右邊。棺木嘛，就買兩副棺材，一副中，一副西，然後各自鋸開一半，再釘好它，做完成一副中西合璧的棺材。
「個棺材會唔會唔穩陣呀？」他問。
「人都死咗啦，你理得佢穩唔穩吖。」我答。
「唔通我又將你既先人鋸開一半？」他不悅地說。
「左邊著西裝，右邊著壽衣，咪搞點囉。大概一星期之後，你嚟滲會醫院，接一個叫葉至誠既人」我滿意地說。
老闆見推銷失敗，唯有退而求其次。他說：
「好既，冇問題。順帶一提，我地而家做緊promotion，推出心連心優惠計劃呀！如果你咁啱又有另一個親戚不幸離去，我哋仲有個合家歡套餐。」
我覺得繼續跟他糾纏的話，可能會暴斃，頭也不回便轉身離去。我一路走，一邊聽到老闆喊道：
「要唔要埋我地嘅紙紮全套呀？包括花園洋房、Nokia8850、無限寬頻、仙鶴一隻、大轎一亭連兩名轎夫……。」
不是陰間太荒誕，而是人世太現實。
第六章
我在興發茶餐廳待了一整個中午，我那親愛的好友阿洋才施施然到來。除了問候他之外，我實在想不到另一句開場白。他竟然要一個積極人生的絕症病人等候他這個長壽厭世者，這是甚麼道理？不料，他竟忿忿地說：
「呢個世界真係唔公平！點解有啲人要等人，有啲人就要俾人等。」
我問他是否一來到就想找死，他答：
「觀點與角度啫。再講，有冇得死唔係你揀，唔係話我想死就有得死架喎。又或者調返轉講，世事啲野講唔埋，分分鐘我仲早死過你。你知唔知道今日係咩日子呀？四月四號，幾邪呀！」
「四月四號同你死唔死有咩關係？」我問。
「四月四號兒童節呀！你知唔知今年兒童節適逢星期日呀？啲細路踩住啲滑板車呀、三輪車呀咁亂衝亂撞，隨時俾佢地撞死！我好脆弱架咋。」
我深信這種人是不會輕易死掉的。他接著說：
「你又講得啱喎，你信唔信神都好，不妨想像哩個世界有一個造物者，佢好鍾意同你開玩笑既。你想早啲死，佢唔會俾你死；你唔想死呢，佢就要你死。」
我問這是甚麼道理，他一本正經地說：「哩個唔係道理，係人生！」
他呷了一口茶，又說：「唔好講咁多廢話，食野先。呢餐係咪你請？」
「點解要我請？」
「你都就死啦！攬住咁多錢有Q用咩？」
我沒說甚麼，他竟然當我應承了！
「喂，食乜好？」
「你想？」
「A餐北菇雞飯好唔好？」
「你想呢？」
「定係B牛扒意好呢？」
「咁你想呢？」
「唉，理想，理想，理想唔使食咩？你知唔知理想哩兩個字好沉重架？搞到我胃口都冇晒！伙計！唔該一個餐A加餐B，加飯底！你食乜？」
「蛋撻，唔該。」
「乜胃口仲差過我呀？醫生最近點講？」
「前排照完個肝同膽，張X光片好驚人。」我答。
「點呀？」
「照到『忠肝義膽』四個字！」
「『忠肝義膽』係病哩既咩？」
「你唔覺忠肝義膽嘅人特別早死既咩？」
「又係喎，正史都話文天祥同史可法都係咁樣病死，冇得醫架啦。」
「所以我有一個諗法，不如嚟個終極表演。」
「咩終極表演呀？」
「我決定參加《睇你點死》！」
「你唔係成日鬧個個節目既咩？」
「係呀，睇人地係一件事，自己玩又係另一件事，再講，有一百萬喎。」
「你實贏到架？」
「放心啦，我去過電視台，佢對我自己搞個中西合璧既葬禮好有興趣。」
「葉至誠呀葉至誠，你生前不值半個錢，瓜左倒值一百萬。」
「呢啲做叫『靈魂蕭條，肉體增值』。」在這個年代，人沒有靈魂比較值錢吧？
「其實你都就死啦，要一百萬黎做乜？」
「我有一個諗法，如果我地真係羅到一百萬，我想租架直昇機，將啲錢係天空度灑落中環，我想睇下人可以為錢瘋狂到咩地步。」
「你發燒呀？你啲諗法幾時變得咁正常架？」
「人之將死，其言也善。」
「唔使咁煩啦，你黎我屋企灑，一樣睇得到。」
「厭世者要一百萬做乜？」
「我想再折墮d嘛，有一百萬都厭世喎，幾折墮呀。」
「一百萬都唔係好多啫。」
「無論係對物質負資產定係精神負資產，都已經係雪中送炭。」
我知道阿洋這個人是不簡單的，聽到「雪中送炭」這個詞，便知道他讀過書，見過世面，他的話一定有他的道理。為了表示謝意，我決定拿了一百萬之後，在長洲租一間度假屋給他，連炭、炭爐和炭精。
「我已經決定要灑一百萬落街，只有你先幫到我！」我說。
「好呀，灑一百萬落街……，哩個世界好耐未試過有咁正常既野發生，可惜你睇唔到。」
「咁又未必。」
「點解？」
「聽佢地講，話啲獎金可以預支，原來好多人窮到冇錢搞葬禮。如果好彩既話，話唔定可以睇埋至死。」
「放心，哩件事就交俾我啦。」
「其實我今日搵你，仲有一樣好重要既野想俾你。算係報酬啦。」我從背包中取出一個公文袋，依依不捨地交給他。
阿洋抱著審慎樂觀的態度，慢慢地把公文袋打開，吞一吞口水，說：「哩啲嘢對你好重要架喎。」
「唔使眼濕濕望住我啦，我都唔係好想俾你，但總唔可以帶埋入棺材。」
「放心啦！我會好好咁保存佢！」
「唉，我覺得人生有陣時好似……」
「蛋撻。」待應把一碟蛋撻扔過來，把我的話打斷了。我看見人生隨著碟子嘀嗒嘀嗒，在餐桌上震動。人生轉呀轉，由碟的邊緣，轉落碟的中心，震落了好些酥皮。
第七章
我感受到生命一分一秒地溜走，不過時間愈少，反而不知要幹甚麼才好。我沒有甚麼未了的心事，只好周圍閒蕩著，一個貌似道士的推銷員，從一堆寬頻推銷員中殺出來，死釘著我。我兩歲已經不用學行車，七歲便精於捉伊人，十二歲加入田徑隊。雖然後來淪為後備，但十六歲在100米跨欄中贏得亞軍（當中有三個參賽者，其中一個棄權），豈能讓一個推銷員截住？
看見他來勢洶洶，我也不敢怠慢，馬上使出「神行百步」，可是對方也不是販夫走卒，使出「凌波微步」追著我。可嘆我的「神行百步」只可以用上百步，否則肺部岌岌可危，最終還是被他截住。
「你印堂發黑喎！睇怕有不治之症降臨係你身上。」他說。
「你係相士定sales呀？」我一邊喘著氣，一邊說。
「小姓蕭，係更生協會既希望大使。我地公司最近同美國IAAC公司合作，聯合發明嘅一種全新既抗癌特效藥。」他遞上卡片說。
「咩IAAC呀？」
「即係International Associated Administrative Company，尊門去幫啲有絕症嘅病人。」
「我睇IAAC係I am a cheater嘅簡稱，尊門去呃d有絕症既病人。」
「你咁講就唔係咁岩啦。你又未試過我地個療程，點可咁快下結論呢。」
「醫生話咗佢冇得醫架啦，你慳番啖口水啦。」我不奈煩地說。
「你聽埋我講先，話明最新特效藥，香港啲醫生點會咁快知呢？」
「又會咁啱畀我知先嘅？」
「世事啲嘢就係咁橋，期期都有人中六合彩，之前你唔中，今次終於輪到你。中唔中六合彩，其實都唔係你揀！」
「得啦得啦，我唔要你隻藥呀。」
他完全無視我的話，說：「我介紹下哩隻特效藥先丫，我地隻藥叫『排毒殺癌寶』，有癌醫癌，冇癌防癌。」
「我末期架！」
「我地隻藥無論對末期、中期、初期既癌症都一樣有效。」
「我開過刀都醫唔好呀，何況淨係食下藥。」
「殺癌？唔使開刀既，有排毒殺癌寶就得勒。殺癌寶確係威，殺癌寶的確好使！」
這個語調好生熟稔，對了，是那個黑旋風忍者！怪不得我跑不勝他。「大唔大樽啲呀！」我看見他拿出了「排毒殺癌寶」。
「唔算大啦，哩個已經係細樽裝，係我地免費加送50%啫。」
「邊食得晒？」
「食唔晒仲可以分畀啲親朋戚友嘛。」
「隻藥係咪真掂架？」
「臨床實驗證明，有九成人食過我嘅隻藥都會好轉。」
臨床實驗，聽是聽得多，究竟實際上是甚麼，我倒不清楚。不過人就是這樣，只要有一些類似專業名詞出現，那有公信力。「要幾錢呀？」
「只須一千八百八十八。」
「嘩！唔好再貴嘅？」
「唔貴架啦，我地隻藥用左十八種唔同嘅珍貴藥材精煉而成，例如有野山靈芝抽取液、人蔘精華、特強天山雪蓮等等。」
其實我並不相信他，但人總須要希望。為甚麼每期六合彩都有那麼多人買？難道他們真的想過自己中獎嗎？大家都須要一個希望而已。只要有希望，人就能短暫忘卻現實。
推銷員見我思量著，說：「前排有個就嚟擒布添呀！一食一屙，乜事都冇晒。」
我買了一瓶希望回家，胡亂的把它吃進肚子。希望沖呀沖，由喉嚨沖到大腸，變成糞土，變成絕望。
第八章
心電圖「咇」、「咇」有節奏地響著。葉至誠躺在病床上，他的父母望著醫生，就像等待判刑。
「佢一番到屋企就又屙又嘔啦。」媽說。
「醫生，夠竟佢點呀？」爸接著說。
「我地同佢做咗個詳細既檢查，病人唔會捱得好耐。」醫生答道。
「佢之前明明好好地格。食錯嘢肚痛啫，點會突然……。」媽嗚咽著說。
「呢啲現象，我地一般叫做迴光返照，但係當血液既賀爾蒙消耗晒嘅時候，病人亦都會……。」醫生說。
「咁佢大概仲可以捱多幾耐吖？」爸追問。
「相信佢過唔到今晚。」醫生說。
第九章
人死後沒甚麼地方好去，來來去去只有那兩處地方。來接人的，來來去去也只是那兩個。天使輕輕的步入葉至成的病房，左右徘徊，似是深思著甚麼。此時，另一位要員，魔鬼也趕到。天使、魔鬼大概都想不到對方也在場，感到十分驚愕，二人相對而視，仿似仇人。
「又撞到你隻衰吖！又係地獄上嚟搞搞陣。」天使不滿地說。
「我點似得你地啲天堂公務員呀，個個都鐵飯碗，唔使做呀？」魔鬼不屑地回應。
「你講呀？我做事一向公證嚴明。冇事嘅就一定冇事，有事嘅就一定有事。」
「係囉，成日掛住做，咪搞到你而家咁囉。睇下妳，魔鬼面孔，天使身材。」
「你……，你太膚淺喇，我地講內涵。美麗係唔會永恆架！」天使雙手掩著胸部，羞怒地說。
「但係醜陋就係永恆。」
「做正經嘢，費事理你。」天使強忍怒氣地說。
「今次你唔好再同我爭。」
「喂，你好囉喎，上次你已經搞到我俾老細鬧到成隻狗咁，今次無論如何都唔可以讓你！」
「上次個個明明就係好人，到你揀咩？」
「上次個單唔講，今次無論如何都唔可以讓你！」
「你唔係唔知哩世界愈來愈多衰人，我地獄就黎迫到爆。呢條友，你收！」
「你傻架？而家個個都旨意我地庇佑，個個都話要我地打救，天堂夠滿晒咯！」
「呢條友橫睇店睇，都唔似衰人。」
「都唔見得佢係好人。」
「佢次次有散紙，都去買旗喎。」
「嗰啲賣旗嘅人塞晒喺路口，佢局住要買啫。我翻查過佢啲資料，我肯定佢唔係好人。佢成日都睇鹹碟架，一定要落地獄。」
「佢買正版架喎，睇鹹碟都尊重知識版權，真係冇幾多個。應該俾佢上天堂。」
「弊在佢六年級已經去後樓梯執鹹書，仲要係行渾全棟樓嗰隻。」
「或者佢想探索生命嘅奧秘。」
「淨係交配嗰part囉。」
「但係佢睇得夠誠懇喎。你知唔知點解，每次佢去執鹹書，都要由最低個層開始，慢慢行上去咁辛苦，而唔係搭電梯上到最高個層，然後行番落嚟執咁蠢吖？」
「冇深究過喎。」
「就係基於信念！佢相信一分耕耘，一分收穫。」
「有次佢試過搭電梯架。」天使反駁道。
「所以個次佢乜都執唔到囉。自此之後，佢每次都堅守住哩個信念，覺得咁做，上天至會畀多啲鹹書佢。」
「你夾硬屈我哋呀？」
「佢有祈禱多謝你地架。信者得救，你老細話嘅。」
天使與魔鬼爭論不休，誰願背負一個貶值的靈魂？十二點的鐘聲響起，時辰已過，天使與魔鬼都不用背負葉至誠的靈魂，倒各自揹了一個黑鍋。
第十章
阿洋坐在我床邊的椅子，開著了電視，一邊對著我的屍首說：
「雖然你睇唔到，總算幫你完成左心願啦。」
「嘩！」我突然彈起大叫。
「嘩！」阿洋被嚇得倒在地上。
我們對望了好一會，他說：「你生定死架？」
「咁你呢？」
「醫生！醫生！佢冇死呀！」
醫生匆匆趕來，用電筒照了照我的眼睛，又拿著聽筒，在我身上左聽右聽，表情十分詫異。
「咁我而家究竟點？」我問。
「你哋等等，我搵Doctor Powers做一個詳細嘅檢查，先可以下定論。」醫生答道。於是他又匆匆離去。
「我都諗住自己死硬，點知……。」我說。
「咁咪好囉，你好想死咩？」
「咁又唔係，但係而家……，唉，搞到我唔知點咁呢。我乜鬼都準備好晒，突然又話唔使死。」
「嗰感覺好似form 2個次，準備好晒去班會旅行，點知突然落大雨，勁冇癮！」
「不過最抵死係當決定取消之後，又突然陽光普照。」
「人生真係多野都冇得揀。」
感慨一番之後，我覺得有必要談回一些正事，我說：
「還返啲嘢嚟。」
「吓？」
「唔好扮傻，個公文袋呀！」
「你要公文袋呀，我屋企大把。」
「啲碟呀！我啲鹹碟！」
「喂，係你話送晒畀我架喎。」
「咁個陣我以為自己死梗呀嘛，而家既然冇事，梗係另作別論。」
「講咗嘅嘢點可咁易收番。你都贏左一百萬啦，想買幾多碟都得呀。」
「咩呀？」
「你參加左《睇你點死》贏到一百萬呀嘛，你啲廣告勁到通街都係呀。」
「你仲笑？而家死唔去……，咁點丫？」
「同佢地講，有奇蹟出現，死唔去囉。」
「唯有咁啦，你拿拿聲退返一百萬俾電視台。」
「我灑左落中環啦。不知幾莊觀呀。」
我頓時雙眼發眩，但願是聽錯。這一回，真是非死不可。我身體顫抖著，說：
「咁而家點好？」
「畀返千五蚊我！」
「你講乜呀？」
「我灑完一百萬，啲差佬捉左我，但係香港無法例話唔俾灑錢落街，最後佢地屈我隨地拋垃圾。」
「你仲講哩樣！而家我死唔去，又冇左一百萬，咁點呀？」
「詐死！我地那那淋出去。我當你死左，送你去電視台！」
我穿好那件唐裝西裝，躺在中西合璧的棺材裡，參加這個盛大的葬禮去了。
第十一章
電視台的工作人員各有各忙著，我躺在棺材裡，聽一把熟稔洪亮的聲音。
「歡迎各位收睇聯褔長生店特約─《睇你點死》！大家好，我係您嘅節目主持人陳鬼怪。」
「我係大車Ming。」
「今日我地節目又會送出總值一百萬獎金同獎品，大車Ming，麻煩你介紹一下。」
「今晚嘅得獎者將會贏到既獎金同獎品有，榮發石廠送出墓碑連同獎金，價值四十萬；聯福長生店送出棺木連同現金，價值六十萬。」我聽著現場觀眾的掌聲，聽得心寒。
「聽聞今晚得獎者個喪禮中西合璧，好特別喎。」
「係呀。而家仲落埋大雨，真係好悲莊！」
「咁事不宜遲啦，同今日嘅嘉賓傾下偈先。有請！何兆洋先生！」眾人又鼓起掌來。
「何生，麻煩你介紹一下今日既主角。」大車Ming說著。
「佢叫阿誠，葉至誠。」
「可唔可以講吓佢點去？」陳鬼怪接著說。
「佢肝癌膽癌死，癌症真係好可怕。如果佢唔係咁忠肝義膽，應該唔會咁早去，所以我係度奉勸屋企睇緊電視嘅小朋友，千祈唔好忠肝義膽！」
大車Ming見到阿洋胡言亂語，馬上改變話題，說：
「佢哋點解會黎參加哩個節目？陳鬼怪，不如你講吓葉先生有啲咩說話留低畀我哋？」
「葉生話，死，唔緊要，最緊係死得轟轟烈烈。佢覺得我地個節目好有意思，可以令人從另一個角度欣賞生命。」我何時有說過這些話？
「雖然葉先生已經不幸離開哩個世界，但係都恭喜你地贏到今晚嘅獎金同獎品。」
「點解佢地會有中西合璧呢個構想？」
「葉生話呢個世界太亂，佢覺得啲人為咗唔同既宗教信仰打餐死好無謂，於是想搞個中西合璧既喪禮，話俾哩個世界嘅然人聽，宗教係可以大融和嘅！」看來我一天不死，一天也不會如此偉大。
「好偉大嘅理想，希望你地可以實現。事不宜遲，我哋即刻睇吓葉至誠先生嘅葬禮。去片！」
我聽到中西哀樂同奏，二者仿似互相競爭，非常吵耳，這就是所謂的中西文化交流，宗教大融和。
拍完這段片後，下一場戲是扶靈上山的戲。數個扶靈的人抬起我的棺木，登山去也。那天真的好大雨，那個渾賑的中西合璧棺木不斷滲水。突然，我聽到一聲慘叫，其中一個扶靈者好像滑倒，我只感到自己連同棺木從高空高速飛下，不知要飛向天堂，還是地獄。
漫天溪錢，像雨點般緩緩灑落，飄呀飄呀，合共一百萬。我看見中環，人們像瘋了一樣掙錢，那是像天堂的地獄，那是像地獄的天堂。
完
Posted in: 寫作 |
回應(1) | 回應的RSS | 暫時未有引用通告| 
(0)
2006 十一月 4 at 6:35 pm 關於《黑箱作孽》以前的回應：
飛鳥 - 3/31/04 11:11:25 am
終於做了第一個留言了。
我很喜歡這篇。
每當我話0的節目有幾無聊，有幾白痴
又叫0的演員快0的死唔好獻世
跟住自己係度追，不是什麼...只是無聊。
放鬆0的啦，香港人！
洋 - 3/31/04 1:29:09 pm
飛鳥，謝謝你。
這篇還會繼續寫下去的。
人就是這樣犯賤了。
有聊節目會有多少人看？
Jennie - 3/31/04 3:07:42 pm
洋洋,
你這篇實在太好笑了。 不過洋洋你很喜歡 "死亡" 嗎?
- 3/31/04 4:38:21 pm
等我而家好好睇下先~
洋 - 3/31/04 4:53:26 pm
Jennie，謝謝妳。
《黑箱作孽》是我兩年前寫的劇本，現在我想把它改篇成小說。這是故事的開首部份，高潮尚未到呢。
怎麼說呢？能不能說是喜歡呢，我想用「情意結」會較適合。或者說，黑色幽默對我的影響很大。
schmeven - 3/31/04 7:32:10 pm
我就話
不如開個新部落寫好d啦
咁又唔會阻你新文章發表
ps：我個friend同我講：
『我有睇你個部落格
不過你個friend果個好睇d』
黃兒 - 3/31/04 9:16:52 pm
好睇既故事.
洋 - 3/31/04 10:14:10 pm
schmeven，唔係好明你講緊乜。
洋 - 3/31/04 10:14:44 pm
黃兒，謝謝妳，要繼續追看啊。
eUniCe - 3/31/04 10:22:32 pm
等o左咁耐 ~
終於等到篇笑o野 ~
洋 - 3/31/04 10:43:06 pm
eUniCe，妳只愛看笑野？
schmeven - 3/31/04 11:16:14 pm
我意思話
你不如開個新部落格寫呢篇小說
如果唔係你遲d有其他隨筆要發表
咪會cut開左個故事lo~
AR肥 - 3/31/04 11:16:45 pm
哈~~~哈~~~^__^~~~!
原來你係維持國際關係加宗教問題和平,
0既聯合國特派使者。
睇而家0既局勢0甘唔穩定......
期待你0既續集!~^0^~
洋 - 3/31/04 11:23:48 pm
schmeven，明白，放心吧，我會先完成它。
各有各而已，人人口味唔同，大家諗既野亦唔一樣。不如你POST番「開左個頭先」個一篇吧，個篇幾好笑。
洋 - 3/31/04 11:33:55 pm
AR肥，是《黑箱作孽》的主角呀，不是「我」呢。
過埋今日十二點我會POST第五節。
謝謝妳的支持。
大頭 - 4/1/04 12:05:11 am
聞名不如見面 , 終於有得看了~!
洋 - 4/1/04 12:08:23 am
大頭，你聽過我說，還是聽過大鼻說？
AR肥 - 4/1/04 1:10:42 am
我知ar!~^0^~
但係感覺上,我已將你代入了主角lu!
只係感覺上,唔洗埋我ga!^__^
仲有我一定會追看的!
大頭 - 4/1/04 1:52:22 am
在你的日記你曾寫過黑箱作孽是自己滿意的作品 , 故想看看
洋 - 4/1/04 2:12:13 am
大頭，我寫的不是日記啦，要是是日記，我也許已死去千回。《黑箱作孽》相對來說，是我較滿意的作品，其實也未必那麼好。
洋 - 4/1/04 2:19:16 am
AR肥，妳又不太認識我，如何將我代入之？還是「我」太像我？
無論如何，謝謝妳支持。
冰仔 - 4/1/04 2:21:48 am
我從前的同房好像也是<<黑箱作孽>>的一員~
蠻喜歡這個作品
也許是認同你的看法.. .
AR肥 - 4/1/04 2:35:17 am
感覺!
主角的性格、諗法......似你!
因為我只是靠平時睇你所寫所應,
感覺出來的。~^__^~
總之佢唔係你,佢只係一個你筆下0既角色!
洋 - 4/1/04 2:38:44 am
冰仔，妳的同房如何像《黑箱作孽》的一員？
謝謝妳。
但其實我都唔係好清楚自己，我的看法是甚麼？
洋 - 4/1/04 3:22:24 am
AR肥，「我」的角色本來是根據我的一位好友而寫成，他和我亦有相似的地方，也許不知不覺間，我把自己的感覺也待入去吧。
明 - 4/8/04 2:12:51 pm
冰仔，我絕對是其中一員啦~~
估不到在這裡見到你~哈~
洋，不就是我囉~~
近期只是變了拉蕾吧~
洋 - 4/9/04 1:11:16 am
明，估不到妳也有來看。
Piszes - 4/10/04 12:58:24 am
我想，我在用自己的一套方式追隨著你。
我也想將自己的故事改篇成小說。
不過...
洋 - 4/10/04 1:35:24 am
Piszes，用妳自己的一套方式追隨著我？不太明白呀？
但我很清楚自己是一個走歪路的人。
改吧，猶豫甚麼？
Piszes - 4/11/04 5:00:18 am
我也不是一個走正路的人嘛！
我是兩條愛游向極端的魚，中間繫著的繩最可憐。
還在想，行一條我最憎0既斜路，慢慢行上去，定係行番一條安全0既平路。
洋 - 4/12/04 2:48:40 am
如果係我，我兩條路都唔揀，我唔行，我要飛，然後在大廈頂層飛落去。
正所謂：「天堂好鬼高，地獄飛天即刻到。」
冰仔 - 4/1/04 2:23:41 am
陰間的人
人世的鬼
是錯配?
還是根本我們一直搞錯了?
AR肥 - 4/1/04 2:48:36 am
果然你真係有死亡情意結!
講起殯儀館~~~
近排逢星期六晚明珠台12點幾,
有一出係講關於一間殯儀館裡,
所發生0既事0既連續劇。
如果冇記錯個劇名應該叫《身前身後》,
呢個劇比我個感覺唔恐佈亦都唔慘,
因為佢比到我有黑色幽默0既感覺!~^__^~
雖然人死係一件好慘0既事,但我睇完感覺係想笑!=.="
而你這篇作品比這套劇的黑色幽默成份更重,感覺更加強烈!~^0^~
所以我會繼續期待想笑0既感覺!~^__^~
洋 - 4/1/04 3:27:01 am
冰仔，是錯配也好，搞錯也好，路已走了，沒得選擇。
洋 - 4/1/04 3:31:56 am
AR肥，我倒沒留意這個節目，黎緊個星期六我會留意留意的。
我還會繼續寫下去的。
泥~ - 4/1/04 3:44:11 am
我亦都有睇《身前身後》呢個劇集
我亦都馬上諗起《黑箱作孽》
感覺
都幾何兆洋
我覺得你真係不仿一睇~
洋 - 4/1/04 10:43:52 am
泥，之前倒沒聽妳說過。
我的名字何時變左形容詞？
Penny - 4/1/04 6:01:55 pm
第一次留言，我有keep 住睇你個部落格架！
今次睇到呢篇文章，令我懷念返青藝既黑箱作孽呀
rerun la...
洋 - 4/1/04 8:23:21 pm
Penny，想不到又有一個inivisible的讀者。
不是我一個說re-run就可以re-run的……。
Jennie - 4/2/04 10:17:12 am
洋洋,
你這個黑色笑話真的很黑呀, 哈哈~ 連殯儀館 sales 你都玩埋。
那洋洋你是否很喜歡穿黑衫, 聽死亡音樂的 "黑" 人?
Irene - 4/2/04 7:26:05 pm
阿洋自命黑色調子，但又不是一個「全黑人」，他也會穿其他顏色的衣服。我覺得還是不要整天穿得黑沉沉，太沒生氣了，而且阿洋經常睡眠不足，再穿黑衣的話便顯得更沒精神了。
奀妹 - 4/2/04 9:31:52 pm
我諗主要係因為肥洋佢本身「黑」人憎.....
哈哈哈
eUniCe - 4/2/04 11:31:47 pm
人生太灰暗 ~ 需要笑來調劑一下 ~
金名 - 4/3/04 2:58:51 am
不嬲都叫你re-run架啦！
呢個戲係「死」不足惜！
洋 - 4/3/04 2:35:11 pm
Jennie，當然了，即係唔玩，一玩就要玩盡d。
我是挺多黑色衫的，不過最近少了穿。我皮膚不黑，運氣幾黑。怎樣才是「死亡音樂」？安魂曲？不過黑人音樂倒真的很好聽，我最喜歡Nat King
Cole 和 Louis Armstrong。
洋 - 4/3/04 2:47:40 pm
Irene，其實我而家都好少著黑色衫，而家放復活假，應該可以安心的好好睡一睡吧。
洋 - 4/3/04 3:03:02 pm
奀妹，好一個硬gag。不過，「黑」的拼音是hak1；「乞」則是hat1。
洋 - 4/3/04 3:06:00 pm
eUniCe，笑笑世人，也笑笑自己吧。
洋 - 4/3/04 3:07:55 pm
金名爺總於肯留言啦？
唔係我一個人就RE-RUN到架，你快D REG返個劇團，你黎導囉。
Irene - 4/4/04 7:39:44 am
阿洋，係呀，依家放復活假，你都要給自己機會「復活」，好好休息，充充電啦！
奀妹，你還是不肯改口，看來我只有兩條路揀，一係努力減肥，一係就無奈地加入肥人一族。但我很懶，不想做運動，即最終還是沒路可揀……
洋 - 4/4/04 12:20:58 pm
Irene，我都想，但我老犯賤地夜訓，我都唔明自己搞乜鬼。
算吧啦，係d埃塞俄比亞飢民眼中，除了自己以外，所有人都係肥人。
奀妹 - 4/4/04 7:49:18 pm
Irene，叫開咗很難改的，而且肥「羊」總比肥「豬」好吧!!!我現在也開始努力做運動，但是很久沒有運動，周身骨痛....
肥洋，在一些肥人心目中，每一個稍為瘦的人都是埃塞我比亞飢民。
我明白你的心情，這是心理病。
奀妹 - 4/4/04 7:59:38 pm
Irene，你唯一可以做的是跟我一樣改口叫他做肥洋，他會很高興的。
奀妹 - 4/4/04 11:46:34 pm
喂，你post一個係討論劉德華應唔應該拎最徍男主角啦，我覺得佢唔應該囉！
洋 - 4/5/04 12:57:52 am
奀妹，妳不算稍為瘦吧？妳試下講下有邊個瘦過妳？
奀妹 - 4/5/04 1:01:35 am
張栢芝，梁詠琪........
洋 - 4/5/04 1:01:53 am
奀妹，妳在這裡討論就是……。
Irene - 4/6/04 12:33:17 am
阿洋、奀妹，看見你們的「對駡」真的很好笑。
好了好了，都是我不好，不應再提這件事，等我做中間人說句公道話：奀妹很標準，阿洋很標準，當然我也很標準啦，哈哈……
奀妹 - 4/6/04 1:03:08 am
對不起！
我份人比較低調，只會說事實。
洋 - 4/6/04 2:25:09 am
Irene，不用跟她說了，盞對牛彈琴。
奀妹 - 4/6/04 3:15:21 am
對牛彈琴，總比對肥洋彈琴好。
脂肪積聚，會令到記憶力衰退的，這在肥洋身上應驗了。
洋 - 4/6/04 3:27:52 am
奀妹，妳講到脂肪與記憶力有關的話，不如去寫荒誕小說好了。
奀妹 - 4/8/04 1:13:37 am
肥洋，這倒可以嘗試一下！
Jennie - 4/12/04 5:59:01 pm
我是第一個留言...!
洋洋, 今天是復活節呀, 還是要寫黑色笑話嗎? :p
不過你唔寫, 我又冇得笑... 真係...
洋 - 4/12/04 6:19:25 pm
Jennie，妳都睇得幾快喎，真教人高興。
係咩？唔理啦，唔通兒童節冇人死咩？
AR肥 - 4/12/04 6:48:09 pm
復活節假期終結,本來有d down down 地!
令我想念起同我無乜關係0既耶先生,真係想佢一年復活多幾次,不過佢可能又要受多幾次難...he...he...
有點將自已0既快樂建築在別人身上......=.="
不過0黎到你呢個"黑色死亡地帶"......哈~~~哈~~~~^__^~~~!
偏偏自已反而有點番生0既感覺!
因為今日第一次笑到出聲ma......仲比人話我(白痴)對住部電腦傻笑!~^__^~
冰仔 - 4/12/04 6:55:59 pm
是另一個黑色笑話嗎?
不知怎的
我就是笑不出來.. . .
Jennie - 4/12/04 7:19:47 pm
洋洋,
日日都有人死架啦。 講開日日都有人死呢樣野, 有日我同我舊老細講, 開殯儀館其實好發, 好過做律師, 又唔駛拉客, 更加唔割喉減價,
除衫遊街搏出位。 佢諗諗下都好贊成, 不過佢話 "一定冇人拜年個時同你講 '生意興隆'"。
洋 - 4/12/04 9:42:01 pm
AR肥，基督可不是無限復活……，雖然暫時我都冇信任何教，但袘受難的事確是偉大的。
可以番生咁勁呀？我寫的時候當然會安排笑位，但實際上，我不知讀者在哪裡會看得最高興，可以告訴我妳看到哪裡笑出聲來？
誰話妳白痴？
eUniCe - 4/12/04 10:12:29 pm
well ~ 個故事有幾多集o架 ?
洋 - 4/12/04 10:15:35 pm
冰仔，妳為甚麼覺得這是另一個黑色笑話？
妳笑不出來，是因為哩節故事唔夠料，還是如我自己所言：「不是笑話」，所以笑不出來？
洋 - 4/12/04 10:25:19 pm
Jennie，我一向都覺得哩行有錢途架，收入又穩定，人人都要死嘛。唔講「生意興隆」，咁講「出入平安」囉。
洋 - 4/12/04 10:25:54 pm
eUniCe，十集多d啦，未定。
冰仔 - 4/13/04 12:24:07 am
這個標題
不就是一種黑色幽默
笑不出來
因覺得有點堆砌
不好意思
我是一個喜在雞蛋裡挑骨頭的人
洋 - 4/13/04 12:36:49 am
冰仔，不打緊，彈讚皆可。
奀妹 - 4/13/04 9:22:53 pm
其實他不一定是堆砌，可能只是貪心而已，希望將自己想到的都放在文章上，難以取捨。
只是我的愚見。
AR肥 - 4/13/04 11:25:48 pm
笑位係有好多,但笑得出聲係我睇完成篇0野先出現!~^__^~
因為之前睇過"ER",
諗起你寫0既0野好似急症室果d醫生0甘,
幫我急救0左我果個又沉悶又痴痴呆呆0既腦,
可以比我轉0下,唔洗腦死!
感覺真係有一點點沖撃ga!~^__^~
至於邊個話我白痴......=.="
算la!佢唔知我因為乜而笑,就話我白痴係佢 既"無知"!
我會原諒佢 既!
只要我知道自己,因乜笑到出聲就得lu!~^__^~
洋 - 4/14/04 12:32:02 am
AR肥，妳喜歡就好，自從強伯離開後，想找一些好玩的文章也不易。我也想找個人醫下我呢。
Irene - 4/16/04 1:24:56 am
喜歡人生的比喻，人生似蛋撻……
「人生隨著碟子嘀嗒嘀嗒，在餐桌上震動。人生轉呀轉，由碟的邊緣，轉落碟的中心，震落了好些酥皮。」
不過……有人喜歡先吃外層的酥皮，有的卻只吃中間的蛋心。我們可以選擇吃蛋撻的方法，但一條漫長的人生路卻沒有太多的選擇。
洋 - 4/16/04 3:10:39 am
Irene，最無可奈何的事，莫過於如此了。
AR肥 - 4/13/04 10:33:12 pm
0華!好緊張ar......>.<"
令我諗起一句說話~~~希望在人間!
洋 - 4/14/04 12:35:48 am
AR肥，其實我大致已寫好結局，再執一執就會post埋出黎。
奀妹 - 4/14/04 1:53:42 am
唏，為何結局是這樣的？
明明不是這樣的。
洋 - 4/14/04 2:00:40 am
不是這樣嗎？
妳看的那個是怎樣的？
AR肥 - 4/14/04 2:03:04 am
0華!今日個腦勁充實ar!~>.<~
洋~多謝你!~^__^~
仲有其實你都已經可以能醫自醫ga la!
簡單講0既即係可以用"自娛",0黎填補你心靈0既空虛!
~^__^~努力去開發la!~^__^~
洋 - 4/14/04 2:45:34 am
AR肥，妳常常來看，我才要謝過妳呢。
若我不懂得同自己開玩笑，我會辛苦的。
奀妹 - 4/14/04 8:25:59 pm
明明有你最鍾意講0既粗口架喎！
洋 - 4/14/04 9:00:09 pm
奀妹，我會說，但不是特別鍾意。
eUniCe - 4/14/04 9:52:43 pm
咁快大結局 ??
洋 - 4/14/04 10:06:23 pm
eUniCe，很快麼？其實可以再寫長一點，例如《睇你點死》個個遊戲，不過我未諗到點玩。
另外，這個故事在演出時，原本是有條愛情線的，不過被我刪改了。
大頭君 - 4/15/04 10:57:28 pm
"「但係佢睇得夠誠懇喎。你知唔知點解，每次佢去執鹹書，都要由最低個層開始，慢慢行上去咁辛苦，而唔係搭上到最高層，然後行番落黎執咁蠢丫？」"
死火......呢單野我唔知o係邊個口中聽過
洋 - 4/15/04 11:21:04 pm
大頭君，你聽過一d都唔出奇，這是真人真事，我也告訴過大鼻。
Irene - 4/16/04 1:30:08 am
一個活在「現實世界」的人還要批判現實，揭它的瘡疤，不累、不痛苦嗎？
洋 - 4/16/04 2:45:55 am
Irene，也許就是因為太累、太痛苦，才要學懂跟現實玩遊戲。
奀妹 - 4/16/04 10:30:44 pm
你鍾意同現實玩遊戲？我鍾意同陽光玩遊戲。
洋 - 4/17/04 1:43:35 am
奀妹，所以妳的皮膚……。
Irene - 4/17/04 10:31:10 am
奀妹，你鐘意同陽光玩遊戲，所以你是陽光女孩。
至於阿洋，他不單只喜歡開現實的玩笑，還喜歡開別人的玩笑，把他自己的快樂建築在別人的痛苦上。他竟然說我像梁國雄，我雖然不漂亮，但也不用這樣醜化我的。奀妹你評評理，我幫他勸你改口，他竟然這樣奚落我，看來是我自己太多事了。
洋 - 4/17/04 1:49:04 pm
Irene，她不是陽光女孩，她是粗野女孩。
冤枉啊！我沒說妳像梁國雄啊，我只是說妳頭髮的長度與他差不多而已。妳怎會跟長毛相似？
奀妹 - 4/17/04 2:26:29 pm
irene，佢真係好過份架，最叻就係歪曲事實。
肥洋，你真係太過份，竟然咁樣話irene。自己明明成個蠱惑仔咁樣，點都要歪曲事實話自己係斯文。
他這種人只懂將事情抺黑。
洋 - 4/17/04 3:11:59 pm
奀妹，我沒歪曲事實呀，我本來就很斯文，以前中學時，我是全校數一數二，彬彬有禮、恭謹謙和、敦品勵學……的學生，是世人誤會了我。
奀妹 - 4/17/04 5:01:02 pm
原來你不是歪曲事實，只是自欺欺人。